Vinars ai 24 di Novembar a lis 20.30, tal Oratori di Codroip al sarà presentât il libri Storie Sacre, publicât tal 2007 e ristampât tal 2016, ch'al è l'ultin lavôr che pre Antoni al à rivât a finî. 

Chest event, inmaneât de Parochie di Sante Marie Majôr di Codroip, di Glesie Furlane e dal Grop Amîs di pre Toni, al siere il program metut adun tal 2017 par ricuardâ pre Antoni tai dîs agns de muart. 

Intal libri, ch'al è pensat pai fruts e no dome, pre Antoni al à fat un struc une vore saurît de Bibie e lu à metût jù in rime par furlan. Come ch'al conte te presentazion si è ispirât a un predi che tal 1600, timp di grandis tensions e di vueris di religjon, intune valade de Slovenie, dulà che la int e jere lade a parâsi, al veve fat un struc de Storie Sacre “pai contadins”, in puisie popolâr e in rime.

”O ai pensât che si podeve fâ ancje in Friûl […] graçiant Idiu no vin vueris di religjon, ma o vin un nemì cetant plui galiot e periculôs: l'indiference e la confusion. In plui mi plaseve che la religjon e vignìs vivude prin di dut in famee e che i gjenitors e i nonos ur fasessin ai fîs e ai nevôts, dongje dal regâl de vite, ancje chel de trasmission de fede e de religjon”.

Program de serade 
Mons Ivan Bettuzzi: Plevan di Codroip, al vierzarà la serade presentant il teme e i relatôrs. 

Relatôrs 
Mons. Roberto Bertossi: President di Glesie Furlane al ricuardarà pre Toni Beline e al fevelarà di cemût che il libri al è nassut. 
Manuela Riccioni: a fevelarà di cemût che si è rapuartade cul scrit di pre Antoni e de sôs voris par fâ i cuadris. 
La mestre Laura Nicoloso: Ti lassi ben content cheste fadie (pre Toni Beline) nus compagnarà dentri dal mont de scriture in rime pe canaie. 
Il prof Luca De Clara: al fevelarà di: Pre Antoni e la riscriture da la Bibie.