11/01/2026
Furlan
Peraule di Vite: Une sole sperance
di Franca Mainardis
“Dome un cuarp e dome un spirt, come che dome une e je la sperance che us à clamâts, chê de vuestre vocazion” (Ef 4,4)
Inte setemane di prejere pe unitât dai cristians o sin invidâts a meti dute la nestre atenzion suntun tema particolâr, chel ripuartât inte letare di Pauli ai Efesins.
Intes letaris ditis de prigionìe, lui si drece ai siei destinataris sbruntantju a dâ une testemoniance crodibile de lôr fede mediant l’unitât.
Jê e je fondade suntun’uniche fede, un sôl spirt, une sole sperance, e dome mediant di jê si pues dà testimoniance di Crist come “cuarp”.
“Dome un cuarp e dome un spirt, come che dome une e je la sperance che us à clamâts, chê de vuestre vocazion”
Pauli nus riclame a la sperance. Ce esie la sperance e parcè sino invidâts a vivile? E je un butul, un regâl e un compit ch’o vin il dovê di tignî amens , coltivâ e fâ frutâ par il ben di ducj. “La sperance cristiane nus dà un puest in chê strete linie di creste, chê frontiere là che la nestre vocazione e pratint che nô o sielgìni, ogni dì e ogni ore, di jessi fedêi a la fedeltât di Dio par nô”
La nestre vocazion, la clamade pai cristians no je un afâr dome tra il singul e Dio ma e je “convocazion”, tantadî il jessi clamâts insieme, e je chê unitât tra ducj chei che si impegnin a vivi il Vangeli.
“Dome un cuarp e dome un spirt, come che dome une e je la sperance che us à clamâts, chê de vuestre vocazion” (Ef 4,4)
Intai intervents e intai scrits di Chiara Lubich o cjatìn spes dai riferiments clârs a l’unitât, il mût di jessi propri de sô spiritualitât: e je la risulte de presince di Gjesù fra di nô. E cheste presince e je risultive di une profonde felicitât.
“Se l’unitât e je cussì impuartante pal cristian, si capìs che nuie si met framieç ni a la sô vocazion ni se che cheste e ves di mancjâ. E si fâs pecjât cuintri l’unitât dutis lis voltis che si cêt a la tentazion, che simpri e torne, dal individualisim ch’al sbrunte a fâ lis robis di bessôi, a lassâsi vuidâ dal propri judizi, dal intarès o dal lustri personâl, no tignint cont o piês ancjemò spresseant chei altris, lis lôr dibisugnis, i lôr dirits.(….)
Patrizia Mazzola
e il team della Parola di Vita
Traduzion par cure di Franca Mainardis
